KALAMPAG

KALAMPAG

By: Jayson de Lemon

Ano na? hiriro-hiro! Hain na ang saindong sinarabi?

kinakalampag na ang mga taong  nagdarali,

Na mga nagturukaw sa mga posisyong sinarabi,

Ano na? darali-dali ta ang aldaw baga ay nag-aagi.

“Dugay na” ano daa? Nuarin pa masimula?

Mahalat ning grasya kung nuarin paso na.

Dai ta aram kung tinatamad, mayong aram o mahina,

Nagtuturukduan o nag-aabang o mayo lang dai man sana.

Ano man kung maaraman mga kahinaan?

Imbes kahagasan gaw’ong kakusugan,

Ta nganing maaraman mga kamalian,

Ta nganing maitama ta masolusyunan.

Sa sampulo daw na ginawang tama,

Saro lang daw na sala gabos na wara.

Ano mang pag-iisip yan ta maging rason ta?

Dai ka baga handa sa saimong panukala?

Naghahanap ning rason o palusot kung iispon,

Pagka ang sarong bagay ay ginibong maraotun.

Ang tama ay tama maski kay isay haputon,

Ang mali ay mali maski dai na pagpara isipon.

Naghahanap masisisi pag ang “feeling” ay “guilty”,

Naghahanap isisisi pag ang “feeling” ay lugi.

Dai na magnegatibo ispon mo nalang maigi,

Ta nganing positibo ay magpalit ning dali-dali’.

Pagka ang sarong bagay ay sadyang nilaogan mo,

Kaulangang handa ka sa mga mangyayadi sa imo.

Aramon mo ang mga mali asin mga tama mo,

Maging responsible ka sa mga obligasyon mo.

Kaulangan ning pakumbabang-loob asin kusog-buot,

Tanos na pag-iisip asin dedikasyong pag-moot.

Sa sinumpaang tungkulun na sa imong naabot,

Kaulangang panindugang byu at ika ay manginot.

Mayo man maraot na maghagad ning tabang,

Tabang na kooperasyon asin mga suhestyong nag-aabang.

Alang-alang sa nasasakupan kamo mag-aratubang.

Sa magayong layunung mapaayos dai man sa yabang.

Ini ay mayong batikos o ano mang pagpakabagabag,

Ini ay pagpamati sa indo sa samuyang loob ay pampalubag.

Sa mga nangyayadi ngunyan kamo man sana ay mahabag,

Pagkat ang layunun kaini ay saro lang sanang KALAMPAG.